Subject: Juhui ich gang ad Expo!!!!

Date: Sun, 21 Apr 2002

Hej!

Vor zwei Wuche han ich mich bim Zivilschutz (ja, das isch scho richtig!) vorgstellt wägemene Job a de Expo. Si händ zwar chli komisch glueget, dass ich mich als Frau für sonen Job interessiere, aber ich han en übercho!!! und zwar de Job als

"CHEFIN D'ARTEPLAGE".

Das heisst, ich mues für öppe 30 Lüt (meischtens Männer zwüsched 30i und 40i) luege, also d'Unterkunft zeige, Chleider gä, luege, dass z'Ässe ume isch (nei, ich mues ned sälber choche!!!!). Ich kontrolliere, öb die Zivilschützler guet schaffed (öb's no chönd schaffe ;-)) bi de Uferüberwachig, de Sanitäter, de Parklotse, bim Reparaturservice und im Fundbüro. Ich wird au no im Fundbüro hälfe.

De Vertrag han ich zwar noni unterschribe, aber er wird nöchschti Wuche gschickt!

Ich bin uf de Arteplage in Biel/Bienne iteilt und bin hütt grad no es Studio go aluege in Studen BE. Das isch öppe en Viertelstund mit em Velo vo Biel ewäg. Det han ich es Zimmer, isch no rächt gross (öppe 3.5 x 5.5 m) mit eignigem Badzimmer und Igang. D'Adrässe schick ich dänn scho mal no, sobald ich alles ganz abklärt han. Ich luege au, dass ich de Isatzplan (ich wird zimli unregelmässigi Arbetszite ha) is Internet chan tue, für die wo's interessiert...;-)

Ich wird vo Mitti Juli bis Ändi Expo (Okt.) also in Studen wohne und in Biel schaffe. Zum Glück han ich letscht Wuche grad en Trainerin vo Biel känneglernt, das heisst, ich chan also au dete go wiiterschwümme, wänn au nüm so vill wie bis jetzt wahrschindli.

So, das wäred mal so di wichtigschte Infos gsi, sorry dene wo's scho dutzendimal ghört händ, aber ich hoffe, ihr freued eu au echli für mich ;-)

------------------------------------------------------------------------------------------------------------------------------

Subject: Adresse in Biel während der Expo.02

Date: Wed, 10 Jul 2002 17:03:38 +0200

Hej!

Wie scho gseit, fang ich ja am kommende Mäntig (15. Juli 2002) mini Arbet als Chefin Arteplge a de Expo 02 in Biel a. En Isatzplan han ich noni, ich weiss ned gnau wie das dänn laufe wird. Aber di noi Adrässe han ich oi scho mal:

c/o Fam. Wüthrich

Gassackerweg 2

2557 Studen

Natel 079 7744001

Ich wird au no es Gschäftsnatel becho, aber die Nummere gib ich niemerem privat, isch wahrschindli besser so;-)

Mängisch chum ich scho no hei, wänn ich zwei, drü Täg frei han, aber au ned immer, aber es isch ja ned am ändi vo de Wält! Sowieso isch es "nume" bis im Oktober, also ändi vo de Expo. Ich weiss au noni, öb ich dete Internetzuegang han, das wird ich dänn gseh.

Aber ich bin ned us de Wält!

------------------------------------------------------------------------------------------------------------------------------

Subject: exponews

Date: Fri, 19 Jul 2002 17:03:38 +0200

Ciao a tutti!

ich han dänkt, ich mäld mi mal, wie's mer da so gaht...

momentan sind grad d'ticinesi da, das heisst, ich chan äntli mal mis italienisch zum beschte gä... natürlich lern ich au no vill vo ihne, aber natürlich so sache, wie's ned im buech stönd;-) es isch au no en berner da, de chan weniger itsch als ich, de chan ich au nochli hälfe und mich au uf schwizerdütsch chli unterhalte...

mini arbet isch ned so schwär, es gitt au ned so vill z'tue und mer sind rächt vill lüt. meischtens bin ich im fundbüro, det hämmer au en pc mit internetaschluss, wänn also niemer öppis verlore hätt und suecht, chan ich surfe. dänn mues ich eimal am tag mini lüt go bsueche uf de arteplage, das heisst zwei pöschte uf em parkplatz usserhalb vom gländ und vier pöschte wo s'ufer tüend beobachte am see vorne. ich luege, dass kei problem gitt und tue's chli unterhalte. das gaht öppe so en stund... mängisch mues ich au id unterkunft vo dene herre go d'wösch sortiere (di suberi!!!) oder settigs zügs... alles in allem isch es ned so sträng, es gfallt mer mega, au wänn ned alli so offe und luschtig werded si wie d'ticinesi;-) die händ anschinend mega froid a mer, geschter simmer nach de nachtschicht no eis go zie, de han ich si heibegleitet (isch sowieso uf mim wäg) und han's no müesse überrede, dass si mich ned heibegleitet... ich han au es namensschildli, wo eigentlich setti dr! uffesta "Chefin Arteplage ZS", aber irgendeine hätt mer das usgwächslet, etzt staht "Ober der Ober der Oberchefin", mues das dänn wieder ändere! mängisch strited's no drum, wär dass dörf im fundbüro schaffe, will ich da bin. ich weiss, das hätt nüt mit mer z'tue, das würded's bi allne fraue mache! es sind ned emal alli so alt, di meischte sind scho dopplet so alt wie ich, aber mini kollege im fundbüro sind 26i und 30i.

mis zimmer isch au ned schlächt, isch ca. 20 min vo de expo wäg mit em velo. han ja en eigne igang, han au en herdplatte mitgnah und mer scho einisch sälber zmittag kochet!!!! nume teigware! schüsch iss ich amigs da uf de arteplage, finde meischtens scho begleitig.

falls irgendöpper mal wett verbicho, tüen oi kei zwang a, chömed eifacht is fundbüro, mich werded's scho känne, han au mis natel eigentlich immer debi. han immer nume en wucheplan, aber de sett (hoffentlich aktuell) uf http://www.margus.ch si aber chömed schüsch eifach mal go luege, würd mi freue!!! (ich han ja sowieso überall freie itritt und mues ned emal astah!!!)

also, hoffe ich ghöre mal chli vo oi!

en liebe gruess

------------------------------------------------------------------------------------------------------------------------------

Subject: newsnews

Date: Thu, 01 Aug 2002 09:11:15 +0200

hej!

etzt bin ich scho di dritt wuche da a de expo in biel und es gfallt mer immer no. d'solothurner sind zwar ned so wie d'ticinesi, han geschter sogar mal es paar müesse chli "zämestuche", es händ mi glaub ned alli so ärnscht gnah... jänu, si händ de glich gfolget... mit de solothurner isch es eh anderscht, ich verstahne etzt ändli mal alles was gseit wird, naja, fascht alles, die wuche isch eine da mitemene extreme dialäkt, han mängisch chli müeh, aber mich verstaht mer ja au ned immer...;-) han letscht wuche scho gmeint gha, dass ich äntli wieder chan dütsch rede, de händ's mer zwei type is büro gä, wo super italienisch händ chönne, die händ de au di ganz ziit alli mögliche sprache gredt, am liebschte "jugodütsch" (händ si gseit). dene hät's jedefalls so guet gfalle, dass si im oktober nomol en wuche chömed, mich go unterhalte...

im september chömed ja nomol zwei gruppe us em tessin, de chan ich also nomol chli italienisch lerne...

hütt han ich beschlosse, dass ich ja eigentlich i de unterkunft mit de jungs chönnt zmorge ässe, dete isch ja de chüelschrank immer volle, bi mer deheime git's ja eh nüt... isch no en gueti idee gsi, etzt han ich am morge usnahmswiis kei hunger meh gha, wo ich is büro cho bin...

geschter hät's deftig grägnet, ich bin zum glück im büro gsi, aber mini jungs uf de wachpöschte am see vorne sind glaub zimli nass worde... zum glück hätt de zivilschutz no einigi rägejagge, die setted dicht si. ich bin denn zwar nach firabig au nümme troche heicho, aber das isch ned so schlimm gsi. han mich sowieso scho langsam as velofahre gwöhnt, gsehne am morge früe sogar scho d'strass!!!!

no vo wäge morge früe... han nachem letschte mail ghört, dass ich meh absätz und mit GROSSBUECHSTABE setti schribe... absätz han ich probiert, aber GROSSBUECHSTABE sind mer bitzli z'asträngend am morge früe;-) hoffentlich chönders glich läse...

mit em schwümme han ich immer noni agfange. bi zwar vorgeschter chli a see go sünnele und au no is wasser, aber trainiert han ich scho lang nümme. aber ich han vor, no im auguscht da in biel wieder azfange, am beschte mit em swimteam bielbienne. mal luege, öb die mich wänd

so, ich glaube, das langes mal wieder für's erschte... freu mi immer über antworte, de han ich wenigstens mal chli arbet;-) neinei, so schlimm isch ned, chan scho öppis mache, mittlerwiile isch au es verlorenigs buech abgäh worde, hoffentlich chömed's es ned so schnäll wieder go abhole, bi nämli noni fertig...

also, wünsch euch was schönes...

------------------------------------------------------------------------------------------------------------------------------

Subject: Neus us Biel

Date: Wed, 14 Aug 2002 09:08:08 +0200

Hej zäme!

Etzt bin ich scho en ganze Monet da a de Expo in Biel und es gfallt mer immer no. Momentan sind grad d'Berner da, es isch also alles no gmüetlicher;-) s'Einzig wo mich da stört isch de Dialäkt... s'Meischte gaht no, aber das "iu" chan ich nümme ghöre!!! Aber schüsch chömed immer no luschtigi Wörtli füre, wo ich no nie ghört han. Di andere findet's de luschtig, wänn ich mues nahfröge, was es heisst... aber schüsch verstömmer ois sehr guet!

Letscht Wuche hät's ja nume grägnet, für mich isch das ned so schlimm gsi, ich bin di meischt Ziit eh im Fundbüro gsi, und schüsch han ich immer no min überdimensionale Schirm (vo de Fundgägeständ) debigha, aber mini Lüt uf em Parking und am Ufer vorne händ de ned so Froid gha am Wasser vo obe... Ich han's de eifacht au gmerkt gha, wo ich mit em Töff da abe gfahre bin, pflotschnass bin ich da acho, sogar mis Shirt isch nass gsi, aber es hätt gueti Heizige da;-) Etzt schint zum Glück wieder d'Sunne, isch au schön warm dusse bis znacht!

Im Fundbüro han ich mal wieder super Lüt, isch immer luschtig, au wänn nüt lauft, so wie geschter. Mer sind bis am Schluss eifacht da ghocket und niemert hätt ois öppis verbibracht oder öppis vermisst. Obwohl ich geschter doch no rächt froh gsi bin, dass es chli ruhiger isch, han am Nomitag en rächte Stress gha! (ja, ab und zue git's das au bi mer!!!) Vo de Spätschicht Uferbeobachtig sind zwenig Lüt cho (nume 5 anstatt 8), drum händ die vo de Früeschicht länger müesse deteblibe und mached etzt dementsprächend Problem. Debi händ die andere nume no d'Zite vom Mäntig im Chopf gha, chan ja vorcho. Mal luege, was mer da chönd mache... Spöter isch de no de vom Parking cho, s'Funkgrät isch wäg... Also nume Problem geschter. Han de au nochli mit de Securitas z'tue gha, etzt känn ich es paar Codes meh, aber die bringed's ned würkli, han ich gmerkt. Aber defür weiss ich etzt, was ich no unbedingt mues go aluege: d'Spinnenetz under de Platt! form uf em See!! Det chasch unde düre laufe, hätt es chlises Wägli für'd Mitarbeiter, ghört zum Rundgang vo de Securitas, hoffentlich chan ich mal mitgah, aber das setti scho ga!

De Abig isch de besser gsi. Es hätt es Personalfäscht für'd Expomitarbeiter gä, gratis Itritt (mit Iladig) und - s'Beschte - all drinks for free!!!!! Bi de aber glich no grad heigfahre, aber noni grad hei, sondern zerscht no id Villa (Zivilschutzbunker) go witertrinke und ässe und go jasse bis am morge am drü, han ned emal verlore;-) Bi aber de froh gsi, dass ich hütt erscht am elfi wieder han müesse afange schaffe;-)

Es hätt da ganz vill Jungi ume wo schaffed, bin erscht grad letschti vomene Zivildienstler aghalte worde, was ich als Frau bim Zivilschutz mache. Debi han ich erfahre, dass de Zivildienst für diversi Pavillons hätt müesse Lüüt stelle... Au mit dene vom Empire of Silence han ich's no luschtig gha, aber bi glich no nie dinne gsi. Bin also immer noni über mini zwei Pavillons cho, sett mal wieder es paar go aluege;-)

Mittlerwile han ich mich au bim Trainer vom SwimTeam BielBienne gmäldet, chan da go trainiere, nöchscht Wuche gang ich de mal go luege, öb ich dene nahmag. Dänn chan ich mal äntli wieder öppis mache ussert Velo fahre. Han mi aber langsam scho as Velo gwöhnt, han nume letscht Wuche Problem mit em Hinterrad gha. Kei Luft meh dinne, aber im Schluch hät's kes Loch... Etzt chan ich ämol wieder fahre, das isch d'Hauptsach.

So, das sett mal wieder lange für's erschte. Ich hoffe, oi gaht's au guet, freu mi über alli Antworte;-) und ich hoffe, mer gseht sich a dem Fritig (16.8.02) in Bremgarte a de DanceNight 2002!!!!

en liebe Gruess us Biel

PS: Dasmal sogar in Grossbuechstabe, obwohl ich vor zwei Stunde immer no im Bett gläge bin;-)

------------------------------------------------------------------------------------------------------------------------------

Subject: Neus vom Job ohni Arbet;-)

Date: Thu, 29 Aug 2002 13:20:12 +0200

So, ich han dänkt, ich chönnt mich mal wieder mitemene "chline" Bricht mälde, was da a de Expo in Biel so lauft... au zum oi chli vom schaffe ablänke, da händer nämli chli öppis z'tue bim Läse;-)

Am Mäntig han ich s'erscht mal chönne mitga go di noie ir Unterkunft abhole, will ich dänn das au mues mache, wänn d'Celinda wäg isch. Es sind wieder - wie letscht Wuche - St. Galler, aber die Wuche sind's ehner chli Buure, das märksch scho, vor allem händ's etzt de wunderschön (?) Dialäkt... de froi ich mich also scho uf'd Tessiner nöchscht Wuche! De chan ich wieder öppis lerne... Aber de St. Galler Dialäkt isch scho ned würkli de schönscht. Aber im Fundbüro hämmer no en Walliser, de Dialäkt isch scho vill besser!

Ebe, d'Celinda (si isch vo Afang a da gsi), hört uf nöchscht Wuche, leider! De Urs isch au vo Afang a debi gsi, är blibt no bis am Schluss. De Phyrum (oder au de Chli oder s'Riisschüsseli gnännt;-)) hört au übernöchscht Wuche uf. De chunnt eine wo scho mal da gsi isch, aber de isch ebe au chli militärisch veralagt, aber das werdemer scho schaffe. De chunnt no ein noie, isch sich scho mal da cho zeige, isch glaub no in Ordnig, mal luege.

Die St. Galler vo dere Wuche chömed us em Toggeburg und sind u brav! Ich han müesse mit em Velo vorus fahre uf'd Arteplage, es sind alli HINTER mer gfahre. Chum isch eine näbed mer gsi, hät's vo hinde gruefe "de Urs hätt gseit hinder ihre!" und scho isch er wieder dehinde gsi... isch no luschtig. Au bi de Instruktione sind's u brav gsi, keis Wort händ's gseit, defür hätt de Chef vo dene schüsch immer en grossi Klappe;-) aber händ em de scho müesse säge, wär da Chef isch (nei würkli, är hätt sich am Afang scho rächt ufgspillt, de hämmer chli müesse düregrife, etzt isch guet.)

Am Afang, bim Vorstelligsgspröch, händ's mi ja gfröget, öb ich Erfahrig han in Sache Leite vo Gruppene, de han ich nume chönne de Schwümmclub agäh, wo ich de chline Chind Training gä han. Aber das hätt glanget, und mittlerwiile han ich gmerkt, dass die Manne au wie Chind sind. Die Frage wo die chönd stelle... "Was hät's für Matratze ir Unterkunft?" Aber es isch eigentlich immer luschtig mit dene! Wenigstens folged's meischtens ganz brav.

Ich han etzt nume gmerkt, dass ich zum Teil uf de Expo (ämol im ChezRüfi) nume als "Chefin" bekannt bin (isch au eine vo mine Spitznäme da, näbed Chräbeli, Amoruccio, Honigmüsli, ... si lönd sich immer nois la ifalle...) hoffentli isch das ned min Fähler... Meischtens dörf ich gar ned zahle, die Manne laded mich immer i, de säged's halt amigs a de Bar "das isch ebe für oisi Chefin" Han mich de aber geschter doch no dete vorgstellt, de Barkeeper kännt mi etzt au scho, hätt mer gescht sogar en Spezialdrink gmixt, mit Ananas!!!

Wänn ich de säge, dass ich no en Teenie bin, chömeds mit ihrne Sätz... es sind immer di gliche! "Ich chönnt ja din Vatter si!" "Ich han en Sohn i dim Alter." "Hett dich vill älter igschätzt" (im Schnitt wär ich öppe so 23i) aber d'Ticinesi sind scho di Beschte gsi... "Noni zwänzgi? De chömed mer ja is Gfängnis?!?!?" Ich mues dezue no säge, dass ich jede (!) Abig han müesse säge "Nei, ich gange eleige go schlafe. Nei, ich bruche kei Begleitig. Nei, ich finde de Heiwäg. Nei, ich schlafe ned bi oi ir Unterkunft..." Ich verbringe ja scho de ganz Tag mit dene Lüt, ned sälte no bis spat id Nacht, isch immer mega Fun!

D'Securitas känn ich langsam au scho chli, sind meischtens di gliche wo mer s'Zügs is Fundbüro bringed, aber au a de Sitzig sind's immer debi. Wänn mer aber chli länger chan em Funk zuelose, merkt mer, dass au die ned so di hellschte sind... "320 a 320 bitte mälde...", komisch wänn dänn niemer antwort gitt... anschinend isch au s'Orientierigsgfühl ned so usprägt, die händ glaub s'Gfühl die Arteplage isch riisig, jedefalls isch es eineinhalb Stunde gange, bis en Mueter, begleitet vomene Securitas mit Funk, ihres Chind, au bineme Securitas mit Funk, gfunde hätt... mues ja schwirig si, hätt ja absolut kei Ahlaltspünkt da... aber au schüsch han ich scho vill ghört vo mine Lüt. Au dene Securitas isch langwilig... "du, da blöterlet's im Wasser, sell ich funke?" und er hätt gfunket...

Mängisch tüend d'Securitas au mini Lüt chli inelegge, indems en Rettigsball inerüehred und wartet, wie lang dass es gaht, bis d'Zivis de gsend. Drum händ gescht mini Lüt au chli "schwirig" ta... "da isch en undefinierbare Fundgägestand im Wasser, chömed ihr mal go luege?" de sind's doch tatsächlich mit em Motorboot da anegfahre und händ dänn das Poulet zum Wasser us gfischet...

Letscht Wuche händ d'Zivilschützer us Rapperswil-Jona welle en Träffpunkt abmache und händ das churzerhand über Funk gmacht ("S'blaue Drüeck trifft sich am elfi im ChezRüfi"; s'blaue Drüeck imene orange Quadrat isch s'Zeiche vom Zivilschutz). D'Securitas händ das aber ned begriffe und händ drum zerscht emal uf en Terrorischtegruppe tippet. ("Blaus Drüeck, tüend oi identifiziere!") Es isch dänn en Viertelstund per Funk so wiiter gange, isch amigs no luschtig zum zuelose;-)

Sitt einehalb Wuche bin ich au scho wieder am Schwümme, chan bim Swim Team Biel Bienne (STBB) go mitschwümme. Die händ no vill Platz da, mängisch mues ich au uf Magglinge ufe, isch bis etzt noni vorcho, aber sett au ga. Ich merke nume, dass mer no d'Kondition fählt, bin zimli kaputt gsi nachem zweite Training da! Aber ich gib d'Hoffnig ned uf!!!

Öfters mal bringt en Gruppe grad no ihre persönlich Journalischt mit, de git's immer früschi Ziitige (die Wuche etzt jede Tag en Biigi Toggeburger) und ned sälte isch de en Artikel vo de Zivilschützer a de Expo dinne. De hänked mer die Artikel im Büro uf, es hanged scho einigi!!!!

Neu cha mer a de expo au go bättle. es hätt es Bättelstudio grad am See vorne und über d'Arteplage verteilt no öppe 9 Pöschte, wo sich jewils eine chan anestelle... die wo sich de Itritt ned chönd leischte, dene wird er zahlt vo de Schwizer Winterhilf. Ich weiss ned, öb das sonen gueti Idee isch. Ich sälber han no keine gseh, aber schüsch han ich no nüt guets ghört... Aber ich han bereits gseh, dass es ned nume "Bettler" hätt, sondern au anderi (ich säg etzt mal "normali" Lüt, fallt mer grad nüt bessers i) wo eifacht für en Organisation sammled.

Mängisch isch es scho schad, chum kännt mer d'Lüt echli und hätt en gueti Truppe, müends au scho wieder ga... Mit einzelne han ich no Kontakt, meh oder weniger, aber di meischte wird ich wohl nümme gseh. Sicher bin ich bi de einte Lüt au froh, wänn ich's nümme gsehne, das git's immer, aber im grosse und ganze isch doch immer en gueti Truppe. Aber die Wuche sind's chli schwach, bin geschter Abig mit drü Zivilschützer (vo 29!!!) im Usgang gsi, wo di andere gsi sind han ich kei Ahnig, schüsch sind immer alli zäme im ChezRüfi. Und obwohl ich hütt am morge di erscht im Büro gsi bin, bin ich doch di letscht gsi, wo hei isch... Villicht lit das dra, dass ich morn chan usschlafe deheime;-)

So, ebe wie gseit, morn han ich mis Weekend bis am Sunntig, demfall fang ich etzt scho mal a Italienisch büffle für nöchscht Wuche;-)

gnüssed oies Weekend au!

PS: ich han mer äxtra Müeh gä mit de Grossschribig und de Absätz, defür isch chli länger worde;-)

------------------------------------------------------------------------------------------------------------------------------

Subject: nass und kalt von der expo.02 in biel

Date: Fri, 27 Sep 2002 22:27:52 +0200

Lang, lang ist's her... han i letschter Ziit chli anders im Chopf gha und bin vill unterwägs gsi, drum han ich nüt meh gschribe, aber etzt han ich da wieder s'Neuschte vo mim Läbe a de Expo in Biel...

Langsam wird's chalt bi ois, s'Männer am Ufer früred gnauso wie die uf em Parking, die vom Fundbüro händ de Vorteil, dass es en Heizig hätt da inne und wänn's ganz chalt isch, mached mer halt d'Türe zue, d'Lüt chömed de scho ine! Aber will's so chalt isch, hämmer etzt oisi dicke Winterjaggene uspackt, das heisst, es sind Fürschutzjagge, zum Teil stinked's au chli eso, aber uf jede Fall gänd's warm, und so schlimm gsehnd's au ned us, eifacht uffällig;-)

etzt han ich mittlerwiile scho vier Pavillons gseh da in Biel, ich mache langsam Fortschritt;-) In Neuchatel bin ich au nomol gsi, det han ich etzt immerhin au scho vier gseh! Ich glaube, ich schaffe's no bis am schluss!!!!

Wo d'Tessiner da gsi sind isch no luschtig gsi. Will d'Securitas meischtens ned italienisch hätt chönne, händ die (im Gägesatz zude Dütschschwiizer) chönne underenand funke... einisch händ's gseit es isch en Eule im Wasser, de ander hätt nume g'antwortet "Capito, Finito", zwei Minute spöter: "Scemo!!!" das heisst sovill wie Trottel Mängisch händ au die en langi Leitig... ;-)

Ebe, mit de Sprach isch's amigs chli es Problem... mer müend da oisi Fundgägeständ au in französisch beschribe. Mängisch isch das ned so eifach, aber zum Glück git's ja Babel Fish Translation... So wird doch schnäll mal en Schlüsselbund zu fédération clée und es Rollbrett zu Panneau de petit pain. Aber mer sind nümme so liechtgläubig und mached's etzt meischtens sälber. Falls mer's de glich ned wüssed, hät's näbedzue i de Garderobe immer en netti Frau wo guet französisch chan! Und au ire isch langwilig...

Wänn mer amigs mal wieder langwilig isch, gang ich meischtens is Nouvelle DestiNation. De Pavillon isch grad bi ois i de Nöchi, isch en Bundespavillon, das heisst, es sind ZivilDIENSTLER dete (ned z'verwächsle mit ZivilSCHÜTZER!!! das händ's gar ned gärn!!) Di meischte sind chli älter als ich und u zwäg. Mer sind amigs au zäme im Usgang, vor allem händ si vill di besser Unterkunft, mit Töggelichaschte, Fernseh und DVD Player! Leider han ich di erscht Videosession verpasst, aber es wird ned di letscht si!!!

Es sind ned alli Zivilschützer immer so zfride mit de Expo. Letschti isch eine cho, de hett welle en Witz verzelle. S'einzig wo er gseit hätt isch gsi: "Expo" Witer hätt er gmeint, es seg ja ned so schlimm, de ganz Tag im Schiff am Ufer z'stah und nüt chönne mache, was vill schlimmer seg, isch müesse go die Pavillons aluege... ich han scho vo villne siite us ghört, dass z'kompliziert seg für normali Mänsche, sind halt Künschtler am Werk gsi... ;-) Mer hätt aber erscht grad chürzlich en Frau im Mistral verzellt (mängisch quatsched's mich dete a, will's gsehnd, dass ich a de expo schaffe...), si seg erstunt, wie guet dass es da isch, si hätt bis etzt nume schlächts ghört, das seg aber gar ned so, ihre gfallts.

Ich han en schöne Geburtstag chönne fiire a de Expo. Grad a dem Tag isch eine vo de Zitig (Der Bund) cho und hätt mich interviewt. S'isch dänn am Mittwuch druf mit Fotti i de Zitig cho, ich sälber han's noni gseh, bin aber scho druf agsproche worde... Han dänkt, wänn ihr mich scho ned so vill gsehnd, chan ich ja no s'fötteli ahänke...

Am Abig hät's dänn es Personalfäscht chli usserhalb vo de Expo im Artix gha. Isch no luschtig gsi, vor allem will's Champagner gratis gä hätt... zum Glück bin ich mit em Velo dete gsi;-) Ich han a dem Abig mal wieder bewiese, wie schlächt dass ich bin im Alter schätze... es paarmal han ich's scho troffe gha, aber bin doch au einisch um elf (!) Jahr denäbed gläge!!!! ojeoje, är hät's mer ned bös gnah, dass ich ihn so jung igschätzt han... *puh*

Ich mache ja jede Tag min Rundgang bi allne Lüt, das heisst Uferbeobachtig (4 Pöschte) und Parkplatz (2 Pöschte). Einisch han ich eine ned grad gfunde, drum bin ich zu de Securitas an Igang zrugg und han gseit, si sell doch bitte em 850 funke, es isch keine da. Si hätt mi nume entsetzt aglueget und gmeint, vorhär isch no eine da gsi. De han ich gmeint, es sett aber en Zivilschützer dete stah und ich finde keine. Ihri Antwort: "Ich chan's schüscht mal em Zivilschutz mälde..." Ich han ihre de müesse klar mache, dass ich au zum Zivilschutz ghöre und dass es de früener oder spöter sowieso wieder zu mer cho würd, si sell etzt doch bitte funke... Aber mit dem noni gnueg, si frögt mich (ich wo eigentlich nie es funkgrät han!): "Was mues ich säge?" Aber ebe...

Sit di zweiti Frau i oisem Team gange isch afangs September, han ich ihri Arbet übernah, das heisst, ich mache fascht alles am PC: Namensschildli und Notfallzättel für oisi Lüt, Lischtene, wär dass alles da isch, wänn öpper chrank wird oder en Unfall hätt... ebe so chli "Mädchen für alles" Mängisch heisst das halt chli Stress, vor allem wänn am Mäntig di noie chömed, aber das isch scho guet eso! Mer gfallts!

So, hoffentlich isch noni de Bildschirmschoner cho bi oi vor luter Läse...;-) ich gib etzt uf, mälde mich sicher nomol vorem Schluss, sind ja no ganzi drü Wuche...

------------------------------------------------------------------------------------------------------------------------------

Subject: Adieu expo.02

Date: Thu, 24 Oct 2002 00:05:18 +0200

So, d'Expo.02 isch itze fertig, das heisst, ich bin itze arbetslos... bi scho chli am Job sueche, han aber no nüt definitivs... aber mues ja zerscht mal alles wieder richtig zügle und deheime iirume, das wird mer scho no es Ziitli gah, aber zerscht nimm ich mer mal no die ziit, zum oi nochli öppis vom Schluss verzelle!!!

Di letschte News vo de Securitas... en Hund hocket dusse vor em Iigang, ohni Bsitzer. Also funked's, dass en Hund dusse hocked, ohni Halsband, was selle mer mache? Meldig vo de Zentrale: "Isch er abunde?" hmmm, ohni halsband.... aber ebe... En ganzi Stund lang händ's über en Schwan diskutiert. Zerscht hätt eine vo de Zivilschützer gmäldet, dass en Schwan vo anderne agriffe wird, de einzig Kommentar :"Das isch dänk Balzverhalte!" Spöter hätt de ZS de gmäldet, dass de Schwan etzt tot seg, aber er hätt de glich no gläbt und isch irgendwie devo cho, aber immerhin isch de Funk en Stund lang bsetzt gsi...

Han äntli dörfe mit em Zodiac (chlises Rettigsboot uf em Bielersee) fahre, han de Securitas vom Team Sauvetage überredt... also, ich gibe's zue, es hätt ned vill brucht, aber ich han mi u gfreut! Han em defür gholfe, di tot Änte zum Wasser us z'fische... spöter han ich de welle mit em Boston (grösser's Boot) mitfahre, aber d'Securitasfraue(!) händ mi ned welle mitnäh. Han de uf de richtig Ziitpunkt gwartet und es isch de wieder de glich druffegsi, wo mi mitnimmt, nume hätt er leider grad en Iisatz gha, de han ich glich ned chönne mitfahre... *snif*

aber defür han ich am letschte Tag (21. oktober) no en andere Securitas chönne überrede, mich under d'Plattform z'bringe... isch no idrücklich gsi det unde, hätt aber ned so vill Spinnene gha wie ich erwartet han;-)

bi de doch no ab und zue go Pavillons aluege, drum han ich's de doch no gschafft, alli bis uf eine z'Biel azluege... aber im viv(r)e les frontières (wo ich ja au jede Abig gange go Fundgägeständ isammle) händ's gmeint, mi Badge bzw. s'Namensschild ("chefin arteplage") seg gfälscht, händ mi ned welle inelah. De händ's welle funke, de han ich gseit, dass ich de am andere Ändi vom Funk au känne (isch au ir Unterkunft in Biel), de händ's mi inegla;-)

in Yverdon han ich au nume eine ned gseh, z'Neueburg han ich öppe d'Helfti gseh, in Murte nume de Monolith, de han i fasch müesse go aluege;-) hätt mer no gfalle!

Vo dene Pavillons hätt's au immer wieder luschtigi Gschichtli gä: Einisch im Nouvelle DestiNation händ's doch tatsächlich gfröget, öb's de Klangturm isch... das gseht mer doch!?!?!?!!! Aber am meischte sind's de doch nach de Migros-Wägeli gfröget worde... Mer hätt au gmerkt, dass sich d'Masse liecht manipuliere lönd... im Geld und Wert isch en alte Maa so atah gsi vo de Usstellig, dass er em Securitas dusse grad d'Hand gschüttlet hätt. Di nöchschte 50 Lüt wo cho sind, händ's grad wiiterzoge... Isch würkli no amüsant gsi!!! Aber i han mi doch müesse fröge... ned weni Lüt hend de Monolith in Biel gsuecht!!! oder schüschtige Seich! Isch ja ned so schwirig... jänu!

Zivildienst Unterkunft wär äuä besser gsi zum wohne, komfortabler und meh Gsellschaft (vor allem agnehmeri als di chline Gofe bi mer dehei, aber i wott ned chlage, han mi zimli schnäll dra gwöhnt gha!), aber das han i erscht ir letschte Wuche gmerkt, jänu. Bi de aber mängisch scho no froh gsi, han i mi eignigs Zimmer, wo ich mi chli chan zruggzie!

Bi üs händ alli en Sack mit Souvenirs becho, drunder au en Einwegkamera. Han de au agfange, Fötteli z'mache und han etzt doch immerhin 6 Film chönne füle... de han ich au no ganz vill Fötteli per CD's zuegschickt becho, wird de es richtigs Album chönne mache, so vergiss ich wenigschtens d'Näme nümme;-)

Bi üs im Büro hämmer am Schluss vier Generatione gha, fascht ämol... De ältischt isch 71i, en Ex-Beamte, wo aber no zimli fit isch, aber doch zimli beschränkt. De zweiti Beamti (de schlimmscht wo ich je gseh han!!!!) büglet immer no bim Bund, isch 59i und hätt immer mich gfröget, öb er das richtig gmacht hätt, öb er das dörf mache, was er mües mache... zum Glück isch no de 43jährig gsi, är hätt alles öppe so gseh wie ich und mer si de es super Team gsi! hei alles chönne meischtere!!!!

D'Schlussfiir isch au ned schlächt gsi, hett eigentlich selle bügle, mer händ de aber doch chli früener Schluss gmacht. Han i de letsche Wuche sowieso meischtens nümme bi mer deheime gschlafe, sondern immer i de Zivilschutz oder Zivildienst Unterkunft, det hät's immer es plätzli gha für mi!!!;-)

Di ganz Expo isch für mi es unvergässlichs Erläbnis gsi, han u vill Lüt känneglernt, wird leider ned alli wieder gseh, bi de einte isch es scho schad, aber bi anderne bin ich au froh... Han vill glernt i dere Ziit (ned nume de richtig Dialäkt vo de Schwiiz, so händ's mer's amigs gseit, bi halt scho chli en Exotin gsi als Argauere...) und i wirde sicher no vill dra zrügg dänke!!!!

e ganz e liebe gruess