Schweizermeisterschaften in Genf, 10.-13. Juli 2003

Will mer ja emmer no chli Platzproblem hend, sind 7 vo de Schwümmer mit em Zug uf Genf gfahre. Debi hed mer mal wieder gmerkt, wer sich gwöhnt esch, öV z'fahre u wer nid... (e chline Tipp Louis: wenn'd länger im gliche Zug inne hocksch, muesch dis Billet ned jedesmal zeige, wenn de glich Kontrolleur durelauft).

In Genf acho, hemmer nach enere chorze Suechi s'Hotel und au s'Schwimmbad gfunde. Isch beides eher nöch binenand, so dass mer immer z'Fuess gange sind.

Bim Znachtässe han i de mal wieder mini Äxtra-Wurscht (oder ebe grad kei Wurscht!) gha, si hend aber kei Ahnig gha vo Sportlerernährig, vo Vegi choche scho gar ned!!!! I ha zum Znacht eifach e Täller Gmües becho (obwohl i Pasta mit Gmües bstellt han). Ha de au zimli schnäll gmerkt, dass da Pulver am Rand NED Zimt esch... aber isch de halt scho z'spat xi;-)

Im Hotel hemmer denn zimli schnäll gmerkt, dass d'Zimmer sehr unterschiedlich si... Einigi hend knapp es Badzimmer gha, anderi nor en Schrank mit eme Brünneli dinne oder eifach en Duschi inegstellt, wenn überhaupt. D'Janine ond ich hend aber es mega grosses Badzimmer gha, fasch so gross wie's Schlafzimmer. Aber au da esch glich no äng xi. Mer hend s'Glück gha, dass üsi Feischter hinde use gange sind. Wenn mer det use kletteret isch, isch mer grad uf es Flachdach cho, wo's sogar no Wöschleine gha hed! Nor schad, dass mer üsi Sache nid hend dörfe ufhänke, de Hotelier isch zimli schnäll cho reklamiere cho... jänu.

Aber zum Glück hemmer im Zimmer en Ventilator gha, isch doch zimli heiss xi, au no i de Nacht!!!!!

Am Abe nachem Znacht sind di meischte Jungs no ufem Flachdach usse ghocket und hend sich rasiere lah. Sehr beliebti Coiffeure si de Tobi, d'Janine und ich xi, mer hed's au vill Spass gmacht!!!!

De erschti Wettkampftag (Donnstig) hed scho guet agfange, de Kilian und de Oli Dietschi hend scho mal verschlafe... D'Nachwuchsschwümmer hend - zu erem Glück - no chli länger chönne schlafe, si hend ja nid müese ischwimme. [Für die wo's ned wüssed: jede Morge sind Vorläuf, am Nomitag (ab 1700 Uhr) sind denn d'Final vo de beschte 16] D'Schwizer "Schwümm-Stars" sind wägere Fählplanig nid a de Schwizermeischterschafte debi xi, sondern im Vorbereitigscamp für'd WM in Barcelona.

Ebe, die Vorläuf si de bi de einte besser, bi de andere schlächter gange. D'Nikki hed über 200m Brust ere erscht Clubrekord gholt, de Kilian esch scho sehr vill nöcher cho. Rechts oisi Damestaffle (Crawl): Manuela, Janine, Julia und Manu

Nachem Zmittagässe sind di meischte is Hotelzimmer go ligge. Mer hend usegfunde, dass sich die Grichtssändige (Richterin Salesch, Familiengericht u wie die alli heissed...) sich wunderbar eigned zum ischlafe! So langwilig wie die sind!! Aber die wo die hend chönne luege, hend au scho Vorteil gha. Leider hend nid alli Fernseher dütschi Sänder gha...

Am Nomitag han i de (dank de Absänz vo de Spitze?!) mit de Janine mi erscht B-Final (400m Freistil) dörfe schwümme!! Bi als 16. inecho, ha mi zwar no chönne steigere, ha de aber glich wieder als 16. agschlage, aber i bi sehr zfride! Am Abe si de di ältischte mit em Trainer no eis go zie im Restaurant näbezue, aber di zweit (gratis) Rundi (Bier/Cola) isch de ned bi allne so guet acho;-)

Wie sell's au andersch si, au am zweite Wettkampftag (Fritig) hed öpper verpennt: de Kari. Mer hend mal wieder gmerkt, dass de Hotelier zwei Gsichter hed: am Morge esch er emmer mega fründlech, er huscht di ganz Ziit um ois ume und wott ois no me adreie, aber am Abe dörf mer nid mal me d'Stäge ufelaufe, ohni dass er mit "Psssst!" cho esch...

I de Badi sind wieder d'Vorläuf xi, i ha's bi 200m Freistil wäge 5/100 nid i Final gschafft, schad. Defür han i über 100m Brust mi eigne Clubrekord abetah. Will am Nomitag niemer hed müesse schwimme, hemmer chli chönne dusse hocke und ois erhole. I ha d'Digicam usprobiert, jetzt wo mer en Schwimmer vo Liestal äntli xeit, hed, was i mues mache, dass d'Verzögerigsziit verchörzt wird.

Trotzdem han i no es paar Versüech brucht, bis de äntli d'Fötteli so worde sind, wie i ha welle...;-)


Da han i au vill Ziit brucht, aber ehner zum d'Jungs überrede, vor mini Kamera z'stah... ;-)

D'Melanie Schweiger (Baar) hed de mal wieder im A-Final dörfe schwimme, und äntli hed si au uf's Stägeli chönne!! Gratuliere!!! (nor: Bernd, nimm doch s'nögst mal au en Kamera met...)

Mis Cousinli han i de au no xe dete, si isch au gschwume, nor leider esch es ere nid so guet gange:-(

Am Abig simmer chli an See und dur'd Altstadt glaufe, isch au no schön xi, äntli mal "La Fontaine" (oder wie da heisst) z'xe...

Am Samschtig (4. Wettkampftag) simmer nor en chlini Gruppe xi wo hed müese schwimme. De Kilian hed en super Start vorgleit mit sim erschte Clubrekord (400m 4Lagen), i ha de chönne nadopple mit em Rekord über 50m Brust, obwohl i det e chline Schock gha han vorem Start: mer isch mal wieder d'Brille grisse, de han i halt en Schwümmer gfröget, wo grad vorhär gschwumme esch u ha de sini Brille becho. Er isch de im A-Final gschwumme, villicht isch bi mer drum so guet gange?!;-) Im 100m Freistil hed's sogar (mit Clubrekord) für is Final glanget, will eini verzichtet hed. Am Nomitag han i de im Final nomol en Bestziit gschwumme u ha's de schliesslech uf de 14. Platz gschafft.

Drum semmer de am Abe au wieder eis go zie und go astosse;-)

De letschti Tag han i de scho gmerkt!! Langsam bin i müed worde, ha nümm so würkli möge, da han i vor allem bim ischwimme gmerkt. Aber ha de au mis schlimmschte Ränne (200m 4Lagen) mitere Bestziit hinder mich bracht, nach de erschte 100m (50m Delphin, 50m Rücken) isch ja e alles schlimme verbi xi;-). Als Abschluss hemmer de no en Clubrekord gmacht bi de Vierlagestaffle, di letscht Staffle mit üsere Ruggeschwimmeri Julia... Iz hemmer nämli es grosses Problem: Rugge isch di einzig Lag wo mer ke "Zweitbesetzig" hend... drum müemmer iz afange, de Nachwuchs ufboue... uf Rugge!! ;-)

Das isch di ganz Truppe xi, rächts alli mit erne wunderbare (?) Frisure;-)

Nacheme Kebab hemmer d'Heifahrt wieder gmüetlech gnoh, nor no z'vierte mit em Zug, defür mit vill meh ÄrzteSound;-)

Aber um's Büssli simmer au froh xi, emmer wieder gärn!!!

Zum Glück han i am Mäntig chönne usschlafe, d'Janine und ich hend de ganz Tag im Bootshuus vom Oli am Hallwilersee verbracht am sünnele...

Kilian Bossard               Luca Balitro                    Martin van der Spoel                                         Oliver Pelzer

Wenn öpper ergend es bild richtig gross möcht, chan er mer es mail schriibe, de schick i's inere bessere Qualität, da esch keis Problem. Wenn öpper alli wott, au mälde.