Meine Berichte:


mini Ziit im Hotel Tabor, Locarno TI


9. April 2003

Hütt han i scho de zweiti Tag gschaffet, i mues aber no vill lerne! Neinei, i weiss scho, wie mer tuet abwäsche, putze und staubsuge!!! Aber i weiss au nid, was wo isch, was mer no alles mues mache und so... Ich wohne fasch im Hotel, han es chlises Zimmer ime Teil nor für Agstellti (scho no dumm, dass i di einzig bi:-() aber momentan het's ja au no nid so vill Lüt. Es sind iz erscht drü Zimmer beleit vo dene 23. Isch aber au guet, de mues i am morge weniger Zimmer putze;-) S'Hotel isch z'oberscht am Berg obe, in Locarno Monti, mit ere meega Ussicht!!!!



Ich mues en knappi Halbstond Stäge laufe, de bin i ir Stadt unde. Aber das tuet mer au guet!!

Trotzdem nimm i für de Heiwäg de Bus;-) Leider (oder zum Glück) isch iz nid schön Wätter, schüsch würd i am See vorne hocke;-)


----------------------------------------------------------------------------------------------------------------------------------------------------------------------------


Samstag, 12. April 2003

Vorgeschter bin i ir Badi xi, isch no speziell!! Es isch so eini, wie's z'Bremgarte überleged z'mache: überem Freibad isch eifach e Ballon gspannt, isch aber leider au dementsprechend chalt! D'Umkleidekabine sind au u chli und äng und xend au provisorisch us (öppe so, wie mis Büro ar Expo, nor mit duschi;- )). Für üs wär das de Horror!!! Aber es isch defür es riise Becki!!!!

Geschter han i frei gha, i bi uf Lugano gfahre, ha ja eh s'GA kauft. Am Bahnhof in Giubiasco han i müsse umstige, de hend mi es paar Type welle dumm amache, wo's de aber mis Buech xe hend... "o o, tedesco" de hend's mi in rue gla;-) In Lugano bin i de chli umespaziert, de han i per Zuefall e Kolleg vor Expo troffe, ha nid gwüsst dass er det schaffet, ha de mal wieder müese merke, wie schwär de Tessiner Dialäkt isch... ojeoje!!! aber i ha ja no Ziit!!! De bin i nochli a See ghocket, mit eme Buech... bi nämli no vill am läse da, scho einehalb Büecher, wenn mer di loschtige Taschebüecher nid zählt (jaja, Q-ri, i bring der di dütsche mit!!! ;-)) Leider bin i de am Abig z'spat heicho, drum han i müese ufelaufe... de letschti bus fahrt am viertel vor sibni... ha de en volli halbstond gha (zum abelaufe bruch i nur knapp 25 minute), isch no asträngend xi... morn han i de moskelkater :-) aber easy, so mach i wenigstens chli sport!!! ;-)

Min Tagesablauf: Normalerwiis fang ich am halbi Achti a schaffe, mache s'Zmorgebüffet und Kafi. De nihm ich mer mi Zmorge u mache en Halbstund Pause (früe, gäll?!?! ;-)) Nochhär wenn i zrugg chume, bring ich de Gäscht Kafi, tue abtische und abwäsche und d'Chuchi chli putze. Wenn alli Zmorge g'ässe hend, de chan i au s'Büffet wieder abruume. De gaht's dra zum d'Zimmer putze. Je nachdem, öb d'Lüt no bliibed, git's en chlinnere oder e grössere Putz. Nochhär je nachdem nochli anders Zügs putze (Gang, Büro, .... was grad afallt; oder halt dusse wüsche), de han i au scho wieder Mittag. Bis öppe am sächsi, de fang i wieder a. Luege, öb alles tisched isch für de Znacht, Gäscht bediene, da heisst Suppe, Hauptgang und Dessert uftische. Irgendwänn zwüsched em abwäsche han i de au no mini Znachtässe-Pause. Schüsch halt eifach wieder putze was grad so chunnt, hed ja vill!!! ;-) Mini freie Nomitäg verbring i mit umelaufe, am See vorne hocke und läse oder ebe im Internetcafe. Am Abig gan i meischtens früe is Bett, miteme Buech und enere Tafle Ovo Schoggi;-)

s'Wätter isch leider au nid so Hammer... Hütt hed's vill Näbel gha, aber mittlerwiile schiint au d'Sunne wieder, de chan i nochli a See füre hocke... oder i blibe da und luege Harry Potter uf italienisch... mal luege;-)

Leider isch es nöd so ganz das, wo i gsuecht ha, i fühl mi nid so wohl da. Drum hör i nach Ostere wieder uf und suech mer öppis anders, wird scho klappe!!! Isch ebe no schwirig, cha zum Bispil am Abe nümm id Stadt eis go zie zum Lüüt könnelerne, müsst nochedäne ebe en halbstund de Hoger duruf laufe im Dunkle, hed fasch ke Strasselaterne:-( aber ebe... wird scho klappe!!!


----------------------------------------------------------------------------------------------------------------------------------------------------------------------------


Samstag, 19. April 2003

I ha mal wieder zwei Täg frei gha, da heisst eigentli zweiehalb. Wo i s'Zmittag becho ha, hett er xeit, i chön grad iz ga. De bin i ufe Zug gstresst u über vier Stund gfahre, bis i in Filzbach im Trainingsweekend acho bin.

Bim Schaffe lauft's guet, ha sit geschter au no Arbet im Büro. Er hed mega de Abstorz gha bim PC, anschinend e Virus, drum han i müesse Briefe schriibe u d'Getränkekarte nomol schriibe. Irgendeinisch hed er mi de zunere Pause verdonneret, will er gmeint hed, i nihme da z'sträng... wo er de aber gmerkt hed, dass i da eifach cha, hed er gmeint, i hett em da scho vorhär sötte säge, de hett i chönne is Büro u er wäri i Garte;-) so isch es de hütt au xi;-) sowieso verstaht er nid, wieso dass i kündiget ha... "ma lei è così brava!"... wie wenn da öppis mit dem z'tue hetti... aber de seit er immer wieder: "aber i säge nüt me!" ...

Ebe, er isch ja eigentli e Schwarzbueb (Basler), redt aber i letschter Ziit me italienisch mit mer, da wott i ja au lerne. Isch mer sowieso lieber, de Dialäkt gfallt mer nid würkli!! U wenn i de au no anihme, de chan i nümme mit em Niisli rede;-)

Aber bim Thema Abfalltrännig chönnte die Ticinesi no einiges lerne!! Komposcht kenned's zum Teil, aber au nid würkli, da wird eifach alles i küderet! Hane de druf agsproche, de het er gmeint, dass mer da gar nid cha hie... schlimmschlimm....

Wenn i frei ha, de hock i ja meischtens am See... Geschter abig han i au frei gha, will i am Nomi gschaffet ha, de bin i halt a See abe, es hett nümme glänget zum ganz i Süde go es Bsüechli mache. Isch langsam dunkel worde, de si plötzli d'Flädermüs cho, u nöch dure gfloge. Uf einisch isch de no en Ratte d'Stäge vom See duruf cho, hed de aber schnäll wieder umdreiet. Mi hed's nid gstört, i ha mis Buech gha;-) Bi würkli vill z'vill am läse, aber isch au interessant, i gnüsses!!

Ebe, am Zischtig bin i fertig da, de gan i nochli go umereisle, chli go Kollege bsueche vor Expo, de chum i de inere Wuche wieder hei.

Bis denn wünsch i eu allne schöni Ostere!

Buona Pasqua!


----------------------------------------------------------------------------------------------------------------------------------------------------------------------------


Mittwoch, 21. Mai 2003

Vor zwei Wuche bin i wieder im Tessin xi, bi mi go vorstelle bimene Jobvermittligsbüro. Isch no komisch xi, das ganze uf italienisch z'mache, aber si hed mer das wo i nid verstande han chönne erkläre, isch drum rächt guet gange. Aber ebe... iz mues i warte, si mälded sich, wenn's öppis gfunde hend. (schüsch chan i ja wieder mal abega, mues ja s'GA usnütze!!! isch würkli en cooli sach, ha mega freud dra!!!!)

Letscht Wuche bin i au dunde xi, au wieder es Vorstelligsgspröch binere Agentur. Isch zimli ähnlech xi wie bim erschte mal. Langsam han i au s'Rede vill besser im Griff! Chunnt guet!! Isch aber ebe z'gliche wie immer, i mues warte... Aber i ha mittlerwiile au sälber en Internetsiite gfunde, wo sehr vill Inserat hed zum Tessin, cha also au no sälber sueche.

Won i letscht Wuche in Lugano xi bi, bin i grad no e Kolleg vor Expo go bsueche. Mit ihm mues i au italienisch rede, obwohl er mi wür verstah, wenn i langsam dütsch rede. Am Abe si de no sini Kollege cho, das isch de scho chli schwiriger xi... Rund um mi ume hends inere fremde Sprach gredt, de TV isch au no gloffe, i ha würkli müeh gha, zum mi uf öpper konzentriere, isch scho no schwirig!! Und wo's den erfahre hend, dass i e Job sueche, hend's Vorschläg bracht und xeit, si lueged au mal im Gschäft und so... *freu* ha bis iz immer no nüd ghört (ussert SMS, wenn as i wieder verbichume;-)), aber i gibe d'hoffnig nid uf!!!

Am nögste Morge han i sogar mal wieder es paar Manne in Zivilschutzuniform xe, momentan sind's grad in Rivera ufem Monte Tamaro d'Mountainbike pischte am mache für'd WM (?).

Bi dem Wätter chan i nid mal öppis aständigs mache dehei, guet, s'Auto isch e scho putzt, de Rase gmäiet, de Komposcht umbige, aber mer wür sicher no öppis anders i Sinn cho!!! ;-)

Drum mach i momentan nid vill me als trainiere, wenigstens chan mi mal uf öppis konzentriere;-) u am Samstig hemmer e Wettkampf, de erschti verusse!!! Leider hed's a dem Tag fasch no nie Sunne gha, i mach mer also kei Hoffnige... it's just for fun!!!