Meine Berichte:


Trainingsweekends im SCRB


Trainingsweekend in Filzbach (13.-20. April 2003)

S'Trainingslager vom Schwümmclub isch im 2003 wieder in Filzbach xi u i ha versproche, inez'luege und chli de Trainer z'hälfe. Isch no luschtig xi, vor allem, will i s'erscht Mal in Filzbach xi bi, isch en super Alag det obe!! Mega schön!! Isch aber au u asträngend xi, ha sälber in zwei Täg öppe 7 Stunde Training gha (vorhär es Ziitli lang gar nüd me!) u de no öppe 4 Stunde Training gä. Es hend nid alli so Freud gha a mer ("nei, nöd scho wieder bruscht!!!") aber easy, au da müend's lerne!!!;-)

Am Mittwuch abig hemmer de e Testwettkampf gha, will's ja scho sonen super Alag isch, au mit automatischer Ziitmessig!!

aber ebe z'wenig Trainer, drum hend mer Schwümmer au müsse mithälfe. Mer hend vill Spass gha, hend's au sehr ernst gnah! De Philip (ganz rechts) isch inere sehr wichtige (?!) Position xi: als Wenderichter, Starter, Zielrichter, Stilrichter

Bi de Janine und minere ir Gruppe het's eini gha, die hed ersch bi eim Wettkampf mitgmacht, hed au dementsprächend wenig gwüsst. Möcht drum öppis loschtigs verzelle. (i hoffe, dass das au für die loschtig isch, wo nid so vill vo schwümme verstönd;-))

400m Lagen Renne (da heisst 100 m Delphin, 100 m Rücken, 100 m Brust, 100m Crawl): "wieso schwümmed die iz plötzli öppis anders als vorhär?!?!?" de han i ere erklärt, was die überhaupt müend schwimme... bitzli spöter, bi brust, isch de burger nümme vorne, sondern de göldi, de bruschtschwimmer. de meint si: "ö, vorhär isch de no erschte xi... wieso iz nümme?" de säg i ere, dass de burger halt ke bruscht cha schwimme, de meint si: "wieso macht er's de????" hmmm, s'ränne isch ja Pflicht xi vom Martin us, aber ebe..

i ha zum glück ned müesse 400m Lage schwimme, sondern "nor" 200m Rugge, isch ja mini Spezialdisziplin(????). Naja, ha's überläbt;-)

Am letschte Abe (bin i allerdings scho nümme da xi:-() isch Karaoke xi, das isch es Bild vo de Hauptprob:


----------------------------------------------------------------------------------------------------------------------------------------------------------------------------


Lenk, 29.Mai - 1. Juni 2003

Als optimali Vorbereitig für'd Schwizermeischterschafte und d'Nachwuchsmeischterschafte simmer über Uffahrt mit üsem chline Team uf Lenk greist ines Trainingsweekend. Mer hend chli lang gha, bis mer schliesslech dete xi sind, aber das abglägne Dörfli hemmer de glich no gfunde z'hinderscht im Tal. Leider isch d'Badi nid grad bi üsere Unterkunft xi, drum hemmer amix mit em Büsli müese ga. Im Hallebad hend's aber au nid immer welle Platz mache für üs, drum hemmer mängisch au müesse dusse schwümme, isch me oder weniger agnehm xi bi 20°. Mis Problem isch ehner xi grad z'schwüme uf em Rugge;-) S'Hallebad isch u chli xi, no chlinner als z'Bremgarte. Vor allem isch u komisch xi, will's uf de einte Siite nor 80 cm tüf xi isch. Ha am Afang chli müeh gha zum en Rollwendi mache, isch aber voll keis Problem xi han i de gmerkt. Ein Schwümmer vo üs hed de aber doch mal no en Rugge-Bruscht-Wendi usprobiert und isch am Bode acho mit em Chopf, hed no rächt blüetet. I han em scho welle gratuliere für si Muet, das überhaupt usz'probiere, da hed er mer xeit, dass er vergässe hed, dass es nor so tüf isch;-)

Es hed no anderi Gruppene gha i dem chline Feriedorf (Kultur- und Sportzentrum). D'Musiker hend üs ehner chli gnervt, da isch immer wieder en anderi Gruppe under üsem Balkon ghocket und hed probet. Mängisch het's guet tönt, aber au nid immer, aber drum sind's ja da zum üebe;-) D'Fuessballer sind alles Basel Fans xi, bi üs si aber d'GC Fans in Überzahl, drum het's mängisch chli Sprüch gä, aber da ghört ja derzue. Mit de Volleyballerinne isch chli andersch xi. Das si Tessinerinne xi, aber ganz schlimmi!! Mer si de au einisch im Sand go spile, de si si cho zueluege will si grad nochedäne Training gha hend. Zerscht hemmer gmeint, si chönte no lache, wenn mer so spile, aber si hend ned. Wo si de agfange hend spile, hemmer de au gwüsst wieso;-) Aber was die nid gwüsst hend... mer hend eigentli fasch alles verstande wo die xeit hend, au wenn's mit "Leccamelo" cho sind, was no öfters de Fall xi esch;-) Am Abe simmer mängisch go töggele, wenn mer scho mal wieder d'Chance gha hend es Dame gäge Herre Turnier (bzw. Janine&Manu gäge Martin&Oli) z'mache. De erscht Match isch unentschide xi, ebeso de zweit. Bim dritte isch de 7:2 für'd Dame gstande, de letsch Ball hed aber de 5 Pünkt gä.... drum hend mer Dame de halt 12:2 gwunne;-) I ha i dere Ziit au alli Autos chönne usprobiere wo mer dete gha hend!! Zersch mit em Büssli (9 Plätzer), de mit dem vom Oli (Mazda 323GT) u de mit em Auto vo de Janine (Toyota Starlet) han i dörfe heifahre, isch au ohni Problem gange!! jeeee!! S'Training isch au zimli sträng xi, wie sich's ghört!!! En Teil verusse, en Teil dinne. Meischtens mit Rumpfüebige vorhär oder zwüschedinne, hauptsach es tuet weh!!! Aber i dänke, es hed sich de scho no glohnt!!!!

Ich bi de scho früecher hei, ha s'Bünafe gha z'Wohle. Die wo ned cho sind, hend würkli öppis verpasst!!!! I ha zwar fasch nüd gholfe bi üs ar Bar, aber es isch glich es mega fäscht xi. Es hed irgendwie immer gnüegend Lüt bi üs hinder de Bar gha, au nid immer vo üsere Klass, aber es hed guet klappet!!! Villicht git's ja nögst Jahr wieder en Ehemalige Bar vom 2002C?!?!?!


----------------------------------------------------------------------------------------------------------------------------------------------------------------------------


Trainingweekend in Bremgarte, 19.-22. Juni 2003

Spötischtens nach de Regionale Meischterschafte verusse in Wettingen (wo nid bi allne so guet usecho sind, aber mi Fähler isch wenigstens vo de meischte unerkannt blibe;-)) isch klar xi, wer iz würkli chan a de Schwiizer- und Nachwuchsmeischterschafte teilnäh. S'Team für üses Traininglager isch also festgstande, und es sind nid wenig xi!!! Ganzi 20 Lüt simmer xi, aber da esch scho guet so!!!

Donnstig isch ja eigentli en Fiirtig xi, nid aber für üs! Mer hend scho am morge am zähni müese im Hallebad si und zwei Stund intensiv trainiere. De Nomitag isch de gnau so sträng xi. Fritig normal wie emme, nor einehalb Stond am abe. Aber mit em Fritigsusgang isch au wieder nüd xi, am Samschtig hemmer scho wieder am nüni agfange. Am elfi, wo alli kaputt xi sind, simmer hindere id Badi gläge, dass mer au de ganz Nomitag chönd zäme verbringe.

Agfange hemmer mit Beachvolleyball. Aber wie immer isch es bi üs nid nor drum gange, wer am beschte spillt, sondern vor allem au, wer di meischte Spröch bringt ;-) (für die wo mini Schwimmkollege nid könned: i ha nid immer gwunne!! gäll, Chnopf!) Aber wenigstens hend's nümme chönne mit anderne über Fuessball striite wie s'letscht Mal... Nacheme freiwillige Abstächer id Rüss isch es au scho wiitergange, aber dasmal hed üse Trainer chli Verbarme gha mit üs (oder hed er nach de Rüss nümme möge?), isch nid so asträngend xi. Trotzdem hemmer alli Hunger gha und sind zu mer hei go brötle. Über em Füür (en Mischig zwüsche Holzchole und Holz) isch dank em Oli nüd schwarz worde, Salat hend alli chli mitbracht. Nachdem s'grosse Clubzält im Garte vo mim Grossvater ufstellt worde esch, hemmer au chönne ässe. D'Nachbere hend ned reklamiert wägem Lärm, au ned, wo mer znacht am elfi no en Teamsitzig gha hend (Danke villmal!!). Di meischte sind de nochedäne go ligge, a Schlaf hemmer aber nonid dänkt. En grossi Diskussion hed natürli d'Strasselaterne verursacht, die isch grad näbed üs gstande und hed sehr hells Liecht gha. De Kilian hed de mit em Dietschi und em Andy verschideni Sache usprobiert, hed aber leider kei Erfolg gha. Am halbi zwei hed si de zum Glück vonelei abglöschet (ha mi nochedäne erkundigt, eigentli hett si no vill länger sötte brönne, lut Elektra...). I ha de probiert z'schlafe, bi aber emmer wieder gweckt worde. De Oli P. und de Burger hend gschnarchlet, d'Julia und d'Manu hend gschnäderet, de Kili und de Dietschi hend welle go TV luege... isch immer öppis los xi;-)

Am Morge simmer vo de Sunne gweckt worde (oder di ganz müede au vom Wecker), Zmorgeässe verusse uf em Sitzplatz, de wieder is Training. Aber ned, dass es chli gmüetlecher xi wär nach dere chorze, asträngende Nacht, überhaupt ned! Die wo de nümme so hend möge, hend sich de halt eifach me Ziit gnah... I bi jedefalls am Nomitag dehei gläge, ha mi freiwillig nüd me als nötig bewegt!! Aber mer xend ja gli, öb sich's glohnt hed!!

Schweizermeisterschaften 10.-13. Juli 2003 in Genf

Schweizer Nachwuchsmeisterschaften 17.-20. Juli in Vevey