Inferno Triathlon Thun - Mürren, 16. August 2003




mit Dani Kiser (88km Road Bike), Rolf Amrein (30km Mountain Bike), Ralph Strahberger (17km Berglauf)

Per Zuefall eigentlich han i de Rolf Amrein via Email könne glernt, ha ghört, dass si für eres Team no en Schwimmeri sueched. Mer hend de regelmässig no Kontakt gha, einisch bin i au chorz uf Sarne übere. Vo ehm han i also einiges gwüsst, aber di andere beide han i nor us sine Beschriibige könneglernt. Üse Sponsor, Basis 131, han i no nie xe... aber i bi sehr gspannt xi, vor allem au will i no nie so öppis ähnlechs gmacht han!

Am Fritig bin i scho uf Sarne gfahre, dass i ha chönne mit uf Mürre as Athlete Briefing. Isch no interessant xi, hed scho uu vill Lüt gha det obe. Ha de au no per Zuefall eini xe wo i könnt ha, ha si de aber währed em Wettkampf nümme xe.

Am Fritig isch au no de FunTriathlon xi (100m schwimme, 4.7 km Velofahre, 1.3 km laufe; älteri Kategorie 200m/5.2km/2.6km). I ha de en Bemerkig gmacht vo wäge 100m=1min, de hend's agfange höchrächne: 3.2km im Thunersee=32 Minute.... Han also zimli schnäll müesse merke, dass i dene höche Aforderige nid chan standhalte;-)

Am Abig hemmer bim Ralph deheime Znacht g'ässe, de hemmer üs alli i dere riise WG es Näscht xuecht.


No z'mitzt i de Nacht, am halbi vieri, hend's mi gweckt, chli spöter simmer de mit zwei Autos abgfahre uf Thun wo de Start xi esch. De Dani mit sim Bike und de Ralph mit mine Chleider sind mit em Schiff vo Thun uf Oberhofen gfahre. De Rolf hed mi a Start begleitet, so wiit wie mögli. Will e Neoprenazug Pflicht esch, han i zersch eine müesse go sueche. Ha de no im Schwimmclub eine gfunde, danke Peter! Isch mer zwar obedüre es bitzli z'gross xi, aber es isch gange. Ha äxtra no en weicheri Brille usglehnt will i Angscht gha han, dass mer bim Start öpper chönnt drahaue. Ha sowieso chli Schiss gha vorem Start... es sind ca. 500 Schwimmer (250 Teams, 250 Einzel sind erlaubt xi), da gitt also en Massestart.

Bi mi - no zimli müed - go umzie u de go registriere lah. Han dete en roti Badchappe übercho, passend zu de rote Ärmel vo mim schwarze Azug (so isch es bitzli eifacher xi, mich z'erchönne, es send doch nor no füf anderi xi mit some Azug, di meischte andere si eifach schwarz xi). Es chorzes Ischwimme im See, de han i zu mim Glück gmerkt, dass es gar nid so schlimm chan si: Die wo gmeint hend, si seged eh nid so die mega Schwimmer, si vo Afang a hindere. I bi aber trotzdem am Rand usse blibe.

    

Wo de äntli de Startschuss gfalle esch, han i grad chönne so losschwimme wie i ha welle, isch mer niemer i Wäg cho. Ha de am Afang grad no eim chönne naschwimme, han en de aber müesse zie lah, bi nid grad z'rächt cho mit de Situation im See... es hed doch zimli vill Wälle gha, am Afang hend's nid gwüsst, öb's überhaupt wenn'd starte.

I bi doch no zimli guet vorwärts cho, ha nor mängisch chli müeh gha mit orientiere, bi am Afang uf de rächte Siite gstartet, bi de aber doch einisch fasch bim linke Boot am Rand xi... ooops... aber isch guet gange. Obwohls so vill Lüüt gha hed, bin i doch di meischt Ziit eleige gschwumme. D'Wendezone isch bime Schloss xi, das hed mer vom See us guet xe. Nor isch da Schloss nacheme Ziitli eifach nümme nöcher cho, i ha s'Gfühl gha, i chome nid vorwärts. Gäge Ändi vom See isch de wieder eine vo de Siite cho, bi chli näbed ehm gschwumme, de han en stahglah u bi zum nögste füre. Won i de xe han, wo dass i mues usstiige, han i au de siglah u ha no e chline Schlussspurt gmacht. Bim Usstiig, en rutschigi Stäge, sind's scho parat gstande zum mer zum Wasser us hälfe, links und rächts je en starche Maa (so gfallt's mer;-)) De bin i zersch mal baff xi: u vill Lüüt, alli rüefed mer zue "hopp hopp", de han i gmerkt, dass i ja nochli mues renne... Bi grad beschäftigt xi mit Bändeli für'd Übergab usesueche, do esch eine cho wo d'Badchappe hed welle... u das alles währed i grännt bi. Zum Glück sind's nor öppe 100m xi *puh*

No ume Rank ume u de hed's dete meeega vill Biker gha, ha grad mal e Schock becho: Wie find i da iz de Dani?! Zum Glück hed er mi grad xe (de rote Ärmel sei dank;-)) u mer g'ruefe, de hemmer en schnälle Wächsel chönne mache. De bin i aber scho vor em nögste Problem gstande... wie find i mini Chleider bzw. de Ralph?? Aber au das isch schnäll gange, er hed mi sofort xe.

Ha de im Nachhinein erfahre, dass de Dani gar no nid würkli parat xi esch, niemer hed demit grächnet, dass i so schäll bi (bi als 9. us em Wasser cho vo knapp 500 Schwimmer), drum esch er gmüetlech go d'Schueh alegge u hed mi de scho xe cho, hed de schnäll müesse sis Bike go hole u fürestah;-) wenigstens hed er nid chönne nervös werde so;-) De Dani isch de gstartet für'd Strecki Oberhofe, Beateberg, Interlake, Meiringen, grossi Scheidegg, Grindelwald

I ha mi de schnäll umzoge, bi de mit em Ralph uf's Schiff zrugg uf Thun. De Rolf isch scho in Grindelwald xi und hed sich dete bereit gmacht, hed aber telefonisch nagfrögt, wie's gange esch. Mer si de vo Thun us au uf Grindelwald, hend dete en sehr nervöse Rolf atroffe. Während de Ralph grad wiiter esch uf Stechelberg, han i de Rolf an Start begleitet. Jetzt han i au chönne (me oder weniger unbeteiligt) en Wächsel aluege... Mer weiss nid wiit im Vorus, wenn de eignig Maa chond, aber wenn de Speaker d'Startnummere usrüeft, hesch no öppe ei Minute Ziit, de muesch scho parat si. Aber bis die Nummere chond... da hesch vill, vill Ziit zum nervös werde, gäll Rolf;-)



De Dani hed jedefalls mini Vorgab guet chönne bhalte u isch als 10. id Wächselzone cho und hed de Rolf uf'd Reis vo Grindelwald via chlini Scheidegg, Wengen, Lauterbrunnen uf Stechelberg gschickt. Uf de chline Scheidegg hed üse Biker denn di gröscht Fangmeind gha. Scho vo wiitem hed er sis Gottechind ghört rüefe: "Götti, Götti".

    

Ich bi mit em Dani wiiter uf Stechelberg, wo ja de Ralph scho parat (und am nervös werde) xi esch. Mer hend au dete chönne em Wächsel zueluege, isch mängisch no interessant xi. Eine esch mit eme platte Vorderrad igfahre, anschinend hed er ke Loscht me gha zum da ändere. En andere isch igfahre, hed aber si Läufer nid gfunde... de isch glaub nomol hinder'd Büsch;-) üse Wächsel isch jedefalls problemlos gange, de Ralph hed guet chönne starte: Stechelberg, Lauterbrunnen, Mürren. Mer drü andere sind de mit em Seilbähnli uf Mürre ufe und hend dobe uf üse Läufer gwartet zum z'vierte is Ziil laufe.

Wenn eine cho esch mit enere tüüfe Startnummere (under 300), hesch gwüsst, de mues no 8km me als di andere. Das si d'Einzelkämpfer, wo alles elei mached, u nid wenig si vor üs is Ziil (bzw. Mürre) cho! Aber mer sind doch sehr z'fride mit üsere Schlussziit: 8:11.06!!!!!! Defür hemmer es FINISHER Shirt becho und en grossi Portion Pasta!!! Das hed sich uf jede Fall glohnt!!!!


Ralph, Rolf, Dani, Manu


Uf de Heifahrt nach Sarnen bin i scho fasch ipennt, im Hus nachere (lang ersehnte) Duschi de würkli! Ha aber nid lang gschlafe, mer sind de no wiiter ufe Berg ufe, schnäll in Pool, de grilliert. Ich bi de aber am zähni ufe Zug und han unterwägs im Zug gschlafe. Bi de einisch verwachet... hmmm.. de Bahnhof chunnt mer ergendwie bekannt vor... scheisse, da mues i use. Isch de leider scho z'spat xi, aber nid so tragisch, bi de en andere Wäg und mit stöpple schnäller dehei xi als i mit em Bus xi wär;-) Natürli han i de no müesse i Usgang, s'isch ja Crazyhill xi, da esch scho fasch Pflicht!! ;-) Eigentli han i nor chorz welle blibe, aber bi de glich eini vo de letschte xi wo gange esch, aber mer hed's mer glaub au axeh dass i scho über 25 h wach xi bi... de Securitas hed mer jedefalls nid glaubt, dass i no nüchtern bi;-)


Aber es isch e super Tag xi, hed mer mega vill Spass gmacht u i freu mi uf nögst Jahr (Basis 131 hed mi scho welle für di nögste 10 Jahr verpflichte, defür chom i e eigne Neoprenazug über, mit mim Name überem Hinterteil;-) ha no nüt unterschribe...) I chome nor wenn's nögst Jahr de au Team Shirts gitt (das Jahr sind's bim Drucker blibe;-))



nor so zum Vergliich, wie chli mini Strecki xi esch im Vergliich zu de andere...




http://www.inferno.ch

http://www.basis131.ch
outdoor sports shop in Sarnen, Teamsponsor für Inferno 2003